Dal lën al juech: Mostra nueva di juesc dla Sevi
La mostra nueva tl Museum Gherdëina dal titul “Dal lën al juech” conta la storia dla firma storica Sevi, metuda mpe dl 1831 da Vinzen Senoner sa Vastlé tl chemun de Sëlva. Per cinch generazions à Sevi senià la vita de truepa families te Gherdëina, dal lëur te cësa su per l 19ejim secul nchin ala produzion moderna tla sënta nueva dla fabrich a Pontives, stlut l ann 1998. I juesc dla Sevi de Gherdëina à gudù de n suzes nternaziunel.Tla mostra nueva iel da udëi pec uriginei cric ora dla culezion de passa 8000 mostres sëurandates al Museum de Gherdëina. Sëurapro vëniel cuntà dla tecniches dl lëur y de coche les se à mudà cun i mareies nchin a ruvé pra i deseniadëures y artisć de inuem che à firmà l design unich di juesc dla Sevi.
La mostra cun mëises da pudëi se senté ju ntëurvia uel traspurté la sëur dl mond criatif dla berstot y nvië ite i vijitadëures de uni età a se tripé, sperimenté, costruì y jughé tl ambiënt espositif. Families, scoles y ghesć possa tlo scuvierjer deberieda coche n tòch de lën se trasforma te n pez da fé damat do fantajia.
Prugram y furmazion creativa
- Scuvierjer deberieda l mond dl juech: vijita interativa y berstot (deplù nfurmazions)
- La ventures dal Sevi: ancunteda cun i ex - cunlauradëures Sevi (deplù nfurmazions)
Cun l sustëni de
- Repartizion Inuvazion, Nrescida, Università y Museums: Ufize per I museums y la nrescida mueseala dla Provinzia autonoma de Bulsan/Südtirol
- Fundazion Cassa dl Sparani de Südtirol
L’alisa dl potenzial dla culezion de 800 mostres de juesc Sevi ie unida sustenida danora dala Repartiziun Aministraziun dla scola y cultura ladina y dai Chemuns de Urtijëi, S. Cristina y Sëlva.
Inaugurazion dla mostra nueva di juesc dla Sevi, 4.12.2025. Da man drëta a man ciancia: diretëures dla Repartizion innuvazion, nrescida, università y museums Franz Schöpf y Manuel Gatto, diretëur dla Repartizion cultura ladina Mathias Stuflesser cun assessëur Daniel Alfreider, diretëura dl museum Paulina Moroder y presidënt Georg Senoner, ambolc de Urtijei y Santa Cristina Tobia Moroder y Christoph Senoner
La rapresentanta dla Fundazion Cassa dl Sparani per la Ladinia, Edith Ploner, cun l presidënt dl Museum Georg Senoner y cumëmbri dl Cunsëi, 29.01.2026. La Fundazion Cassa dl Sparani à sustenì la investitzion per la mostra nueva cun n cuntribut finanziel de 20.000 € coche integrazion al sustëni prinzipiel da pert dl Ufize provinziel di Museums.